Tiene yo un cancion para na mi lugar na costa weste
Del mi ciudad hermorsa donde pirmi nuay kame kuryente
El diamun barangay donde yo engranda
Ya estudya, ya trabaha, donde mi casa ya planta

Di mi maga bisinos bien conose yo el maga cara
Tiene caray toko tiene tambien maga caray bonita
Pero todo se sila pamilya yo si ta trata
Tan ayudahan kame todo ‘se lang yo puede abla

[CHORUS] Na barangay diamun mucho alegria libre lang
Si ta sinti caliente serca el aplaya banya lang
Kome latu asa pescao casca ya el mangga hilao
Pone’l bagon gata na ojas alyi todo man sawsaw
El barangay diamun masquin lejos mucho ta anda
El maga jente qui amable masquin no conose pa
Contigo cumbida toma y el pulutan chicharon
Este el barangay taqui adentro na mi corazon

Luego de noche camina kita cay tiene ahora bayle
Pone pomada man pa guapo muda tu embuenamente
Y si tiene encuntra bonita dayun atraca
Pidi el nombre pregunta si puede ba uste baila

El maga estrellas bien brillante pruba tu mira na cielo
Prio el aire si de noche el durmida bien sabroso
Llegar aga man kape, y ahora tu puede pensa
Porque bien quierre yo el mi lugar nuay otro cumpara

[CHORUS] Na barangay diamun mucho alegria libre lang
Si ta sinti cunambre mucho maga pono subi lang
Man laga saging de saba, agua butung kita toma
Salta na rio masquin prio cay el dalaga ta mira
El barangay diamun masquin lejos mucho ta anda
El maga dayao cada Fiesta batalyon si ta llega
Ta ase agua el tuba palta pa el sinco galon
Basta alegre lang mientras tan karaoke na telon

[CHORUS] Na barangay diamun mucho alegria libre lang
Si ta sinti caliente serca el aplaya banya lang
Kome latu asa pescao casca ya el mangga hilao
Pone’l bagon gata na ojas alyi todo man sawsaw
El barangay diamun masquin lejos mucho ta anda
El maga jente qui amable masquin no conose pa
Contigo cumbida toma y el pulutan chicharon
Este el barangay taqui adentro na mi corazon